Уръметли талебелер!

Докъузынджы сыныфта сизлер къырымтатар ве четэль эдебиятынынъ тарихыны огренип, девирлер, муэллифлер, эсердеки къараманлар ве эдебият назариеси киби бильгилернинъ саиби олдынъыз. Онунджы сыныфта къырымтатар ве четэль эдебияты тарихында уянув девринден сонъ мевджют олгъан девирлер ве бу девирде иджат эткен муэллифлер, оларнынъ эсерлери акъкъында малюмат аладжакъсынъыз. Эсерлерде акс олунгъан миллий гъаелернинъ къыйметли тарафларыны огренмеге девам этеджексинъиз.

«Къырымтатар ве четэль эдебияты» дерслиги, сизлерни миллий ве джиан эдебияты алемине давет этмекнен бир сырада, медениетли ве къабилиетли, истидатлы ве бильгили инсанлар олып осьменъизге мейдан яратаджакъ.
Докъузынджы сыныфта къырымтатар эдебияты тарихынынъ Къадимий, Алтын Орду, Къырым Ханлыгъы, Рус истилясы, Уянув киби девирлеринде иджат эткен муэллиф-лернинъ аятий фаалиети ве эсерлерини огренип, баягъы малюматнынъ саиби олдынъыз.

Джиан эдебияты акъкъында да баягъы малюмат алып, къырымтатар тилине терджиме олунгъан метинлерни окъудынъыз. Оларны талиль эттинъиз. Джиан эдебиятынынъ, уянув ве ярыкъландырув девирлеринде инкишаф эткен, классицизм, маарифперверлик, романтизм киби джерьянларнынъ хусусиетлерини огрендинъиз. Бу джерьянларнынъ эдебий хусусиетлери ве чизгилерини тайинлемеге биледирсинъиз?

Докъузынджы сыныфта классик эсерлернинъ тилини менимсеп, алышкъанлыгъынъызны арттыргъандырсынъыз? Орхон ядикярлыкълары (VIII асыр), Махмуд Кашгъарийнинъ «Дивану лугъат-ит-тюрк» (XI асыр), Юсуф Баласагъунлынынъ «Къутадгъу билиг» (XI асыр) киби къадимий тюрк эдебий абиделери ве классик назм эсерлеринден берильген метинлерни шимдики земаневий тильде окъуп, тилимизнинъ зенгинлигини ис эткендирсинъиз? Базы эсерлернинъ де асыл нусхаларынен таныш олып, о девирде янъгъырагъан шырныкълы тилимизге мефтюн олгъанынъызгъа ишанчымыз кямильдир.