Уръметли талебелер!

Сизлерни янъы окъув йылынен хайырлаймыз ве ана тили алемине давет этемиз. Докъузынджы сыныфта биз сизлернен къырымтатар тилининъ синтаксисинен багълы назарий къаиделернен ве нутукъ инкишафына аит меракълы меселелернен таныштыкъ.

Бу окъув йылында фонетика, имля ве морфология акъкъында бильгилеринъизни текрарлап, пекитеджексинъиз. Бундан гъайры, сыныфдашларынъызнен берабер субетлешип, метинлер тизип, агъзавий ве язма нутукъларынъызны инкишаф этеджексинъиз.

Онунджы сыныф дерслиги ашагъыдаки къысымлардан ибарет: кечкен мевзуларны текрарлав дерслеринден сонъ, фонетика, имля ве морфологиягъа багъышлангъан дерслер бериле. Багълы нутукъкъа аит дерслерде нутукъ чешит-лери, услюплери акъкъында бильгилеринъиз текрарлана ве янъы малюматлар бериле.

Урьметли балалар, ана тилинъизни огренюв киби, муим, муреккеп, месулиетли иш огърунда деделеримизнинъ икметли сёзлерини, шиар оларакъ, къулланынъыз:

Окъувны севген окъур, сонъундан гульдай къокъур.
Окъувсыз бильги ёкъ, бильгисиз кунюнъ ёкъ.
Окъугъан алим олур, окъумагъан озюне залым олур.
Окъумакъ къайгъылыдыр, сонъу сайгъылыдыр.