Уръметли талебелер!

Сизлерни янъы окъув йылынен хайырлаймыз ве, тувгъан тилимизни огренюв киби, меракълы ве месулиетли ишимизни девам этмеге давет этемиз. Онунджы сыныфта фонетика, имля ве морфология акъкъында бильгилеринъизни текрарлап, пекиттинъиз. Бундан гъайры, сыныфдашларынъызнен берабер субетлешип, метинлер тизип, агъзавий ве язма нутукъларынъызны инкишаф эттинъиз.

Он биринджи сыныфта биз сизлернен къырымтатар тилининъ синтаксисинен багълы назарий къаиделерни текрарлап, нутукъ инкишафына аит бильгилеринъизни пекитип, даа чокъ меракълы меселелернен танышаджакъмыз.

Он биринджи сыныф дерслиги ашагъыдаки къысымлардан ибарет: тильшынаслыкъ фенининъ синтаксис болюгинде огренильген эсас парчалар — сёз бирикмелери, адий джумле, джумле азалары, сойдаш ве айырылма азалы джумлелер, бир теркипли джумлелер, муреккеп джумлелернинъ синтактик хусусиетлерини текрарлавына багъышлангъан дерслер. Нутукъ инкишафынен багълы дерслерде нутукъ чешитлери, услюплери акъкъында бильгилеринъизни текрарлап, янъы малюматлар аладжакъсынъыз.
Бильги къазанув ёлларынъыз дайма ачыкъ олсун.

Ана тилинъизни темелли огренип, зенаат саиби олмакъ ишлеринде сизлерге иджадий енъишлер ве мувафакъиетлер тилеймиз.