У 8-м класе ў раздзеле «Апрацоўка драўніны» вы атрымаеце звесткі пра заганы драўніны. Выконваючы патрабаванні па ахове працы і эканомна расходуючы матэрыялы, навучыцеся стругаць і шліфаваць вонкавыя цыліндрычныя паверхні, а таксама тачыць драўніну на такарным станку.

У раздзеле «Апрацоўка металаў» прыведзены матэрыял пра віды сталі і сартавога пракату. Вы навучыцеся збіраць дэталі з металаў на заклёпках. Будзеце тачыць дэталі з металу на такарна-вінтарэзным станку.

Раздзел «Тэхнічная творчасць» змяшчае агульныя звесткі пра класіфікацыю суднаў і караблёў, а таксама пра суднамадэліраванне. Вы вывучыце віды і агульнае ўстройства суднамадэлей, спосабы вырабу карпусоў і тэхналогію вырабу надбудовы для мадэлей суднаў і караблёў; спосабы канструявання. Пазнаёміцеся з такімі ўласцівасцямі кампазіцыі вырабу, як метрычнасць і рытмічнасць.

Раздзел «Мастацкая апрацоўка матэрыялаў» дапаможа авалодаць на выбар тэхналогіяй геаметрычнай разьбы па драўніне ці драўнянай мазаікі (інтарсіі). Вы даведаецеся, як правільна выконваць разьбу двух-, трох- і чатырохгранных прамалінейных выемак.

Пры вывучэнні кожнага раздзела напачатку працы вы будзеце арганізоўваць вучэбныя месцы ў адпаведнасці з парадкам і правіламі, з якімі ўжо пазнаёміліся раней пры апрацоўцы канструкцыйных і прыродных матэрыялаў.

Таксама ў 8-м класе вы працягнеце займацца творчым праектаваннем у працэсе тэхнічнай і мастацкай дзейнасці.