У 6-м класе ў раздзеле «Апрацоўка драўніны» вы азнаёміцеся са звесткамі пра нарыхтоўку драўніны, а таксама пра пароды драўніны і віды піламатэрыялаў. Выконваючы патрабаванні па ахове працы, вы будзеце ажыццяўляць тэхналагічныя аперацыі: разметку загатовак, струганне драўніны, шліфаванне драўніны, зборку дэталей з драўніны на шрубах.

У раздзеле «Апрацоўка металаў» вы даведаецеся, як выконваць простыя вырабы з тонкаліставога металу, авалодваючы такімі тэхналагічнымі аперацыямі, як праўка, разметка, рэзка нажніцамі, гібка і шліфаванне загатовак з тонкаліставога металу.

Раздзел «Тэхнічная творчасць» раскрые агульныя звесткі пра аўтамадэліраванне, віды аўтамадэлей, тэхналогіі выканання кузава і хадавой часткі; тэхнічнае канструяванне, віды механізмаў; мастацкае канструяванне, уласцівасці кампазіцыі вырабу (прапарцыянальнасць і маштабнасць). Будзе вывучана на выбар тэхналогія аўтамадэліравання або канструявання вырабаў.

У раздзеле «Мастацкая апрацоўка матэрыялаў» вы азнаёміцеся з тэхналогіяй прапільнай разьбы па драўніне і пляцення з саломкі, а таксама навучыцеся эканомна выкарыстоўваць матэрыял. Вы будзеце выпілоўваць ручным лобзікам загатоўкі па знешняму і ўнутранаму контурам, ствараючы розныя вырабы з фанеры. Вы азнаёміцеся з паслядоўнасцю выканання плоскіх пляцёнак, саламяных «павукоў» і іншых вырабаў.