Дарагія сябры!

У IX класе вы ўзыдзеце на яшчэ адну прыступку ў пазнанні прыгожага пісьменства, а разам з ім і ў пазнанні жыцця.

Кніга, якую вы зараз трымаеце ў руках, адрозніваецца ад тых, па якіх вучыліся ў папярэдніх класах. Упершыню вы прыступаеце да вывучэння гісторыі беларускай літаратуры ад сівой мінуўшчыны да нашых дзён. Вас чакаюць цікавыя сустрэчы з творамі розных тыпаў культур (сярэдневяковай, рэнесансавай, Новага часу, XX стагоддзя). Уступіўшы праз тэксты розных эпох у дыялог з пісьменнікам, з культурай у самым шырокім сэнсе слова, вы зможаце адчуць непаўторнасць індывідуальнасці кожнага мастака слова, самабытнасць і ўнікальнасць роднай літаратуры.

Запрашаючы павандраваць у прасторы і часе, пісьменнік дапамагае нам спасцігаць само жыццё, таямніцы чалавечай душы, прымушае хвалявацца за сваіх герояў, суперажываць з імі.

Мастацкую літаратуру называюць чалавеказнаўствам, таму што галоўным аб’ектам яе даследавання з’яўляецца чалавек. Прачытаныя творы дапамогуць вам у асэнсаванні свайго месца і прызначэння на зямлі. Складаныя пытанні паставіць перад вамі жыццё. Падрыхтавацца да годнага іх вырашэння дапаможавамчытанне кніг. «Кніга — настаўнік жыцця...» — пісаў Іван Мележ.

Як вядома, цікавасць да кнігі пачынаецца з увагі да асобнага аўтара, да яго жыццёвага і творчага шляху. Таму ў вучэбным дапаможніку вы знойдзеце асноўныя звесткі з біяграфіі пісьменнікаў. Аналіз прапанаваных для вывучэння мастацкіх твораў адбываецца з апорай на кароткія характарыстыкі гісторыка-літаратурнага працэсу пэўнага перыяду, на паняцці па тэорыі літаратуры.
Гэта вучэбная кніга з’яўляецца своеасаблівым навігатарам у бяскрайнім кніжным моры.

Мы спадзяёмся, што вучэбны дапаможнік паспрыяе вашым памкненням да больш глыбокага пазнання духоўных набыткаў мастацкай літаратуры.

У гэтым вам дапаможа і размешчаны на нацыянальным адукацыйным партале (гл. http: //e-vedy.adu.by) электронны адукацыйны рэсурс «Беларуская літаратура. 9 клас», што, як і ў папярэдніх класах, цалкам адпавядае структуры вучэбнага дапаможніка. Спасылкі на тэставыя заданні, трэнажоры, аўдыя- і відэаматэрыялы вы зможаце знайсці ў аднайменных раздзелах.

Дарагія дзевяцікласнікі! Запрашаем у літаратурную вандроўку! Цікавага і ўдумлівага вам чытання!