Паважаныя вучні!

Вы прыступаеце да вывучэння асноўнага школьнага курса па сацыяльна-эканамічнай геаграфіі. Ён называецца «Сацыяльна-эканамічная геаграфія свету» і цесна звязаны з ведамі, якія вы атрымалі раней. Вы вывучылі пачатковы курс сацыяльна-эканамічнай геаграфіі і ведаеце асновы геаграфіі насельніцтва. Вы атрымалі веды аб рэгіёнах, краінах свету — аб іх прыродных рэсурсах, гаспадарцы і яе спецыялізацыі, асноўных эканамічных цэнтрах. Вы навучыліся адрозніваць краіны па ўзроўні сацыяльна-эканамічнага развіцця. Вучэбная дысцыпліна «Геаграфія Беларусі» таксама ўзбагаціла вас ведамі па эканамічнай геаграфіі. Цяпер кожны з вас зможа расказаць пра асаблівасці насельніцтва нашай краіны, з якіх галін і відаў эканамічнай дзейнасці складваецца наш гаспадарчы комплекс, і растлумачыць, чаму склалася такая спецыялізацыя. А выкарыстоўваючы геаграфічныя карты, вы ўжо ўпэўнена пракладаеце маршруты з адной вобласці ў іншую і ведаеце, дзе і якія размешчаны гарады, асноўныя эканамічныя цэнтры і галоўныя транспартныя артэрыі. Усе гэтыя веды спатрэбяцца і дапамогуць нам пры вывучэнні сацыяльна-эканамічнай геаграфіі свету.

Наперадзе ў нас займальнае падарожжа, таму што ні адзін раздзел геаграфічнай навукі так моцна не звязаны з развіццём грамадства і нашым паўсядзённым жыццём, як сацыяльна-эканамічная геаграфія свету. Кожная краіна і кожны з нас сваімі штодзённымі дзеяннямі, звязанымі з дэмаграфічнымі падзеямі, вытворчасцю і спажываннем тавараў і паслуг, гандлем, міжнароднымі эканамічнымі адносінамі, становяцца часткай адзінага цэлага — сацыяльна-эканамічнай геаграфіі свету — і фарміруюць яе новы геаграфічны вобраз. Але наша падарожжа не будзе простым, таму што менавіта сацыяльна-эканамічная геаграфія свету як ніякі іншы раздзел геаграфічнай навукі вельмі дынамічна і імкліва развіваецца. Паспець атрымаць самыя актуальныя веды, каб стаць сучаснай і пісьменнай асобай, якая выкарыстоўвае новыя тэрміны на новай мове сацыяльна-эканамічнай геаграфіі і ўмее тлумачыць не толькі прычыны і наступствы, але і рабіць прагноз працэсаў, — вось нашы асноўныя задачы.

Вывучаючы сацыяльна-эканамічную геаграфію свету, вы станеце па некаторых пытаннях кансультантамі для сваіх бацькоў. Але пра гэта — наперадзе.