Дарагія сябры!

У 8-м класе мы працягваем з вамі займальнае падарожжа ў гісторыю айчыннай і сусветнай мастацкай культуры.

Першы прыпынак у падарожжы — мастацкая культура Сярэдневякоўя. Перад вамі расчыняць дзверы сярэдневяковыя замкі і саборы. Дзякуючы творам мастацтва вы даведаецеся, як жылі і як выглядалі жыхары сярэдневяковых гарадоў.

Другі прыпынак — знаёмства з самымі значнымі мастацкімі з’явамі эпохі Адраджэння. Шэдэўры мастацтва Рэнесансу раскрыюць вам свае таямніцы. Вялікія майстры «распавядуць» дзівосныя гісторыі пра свае работы, мастацкія прыёмы і знаходкі.

Трэці прыпынак— мастацкая культура XVII—XVIII стагоддзяў. Італія, Іспанія, Нідэрланды, Францыя і Англія прадэманструюць вам найяскравейшыя ўзоры мастацкай культуры, у якіх вы ўбачыце праявы нацыянальнага характару.

Чацвёрты прыпынак — мастацтва, створанае беларускімі майстрамі. Вы апыняцеся ў самых розных кутках нашай краіны: пабываеце ў храмах, убачыце ўнікальныя вырабы, абразы і партрэты, выкананыя мастакамі далёкага мінулага. I абавязкова даведаецеся пра мастацтва сваёй краіны шмат новага.

У кожным падарожжы вас чакаюць сюрпрызы: вы даведаецеся, як творы майстроў розных эпох працягваюць жыццё ў сучаснай культуры.