У гэтым годзе вы працягнеце знаёміцца з рознымі раздзеламі абслуговай працы, будзеце ўдасканальваць тэарэтычныя веды, практычныя ўменні, навыкі і набываць новыя.

Вы пачняце вывучэнне прадмета з раздзела «Асновы прыгатавання ежы», дзе працягнеце развіваць свае кулінарныя здольнасці. Для вывучэння вам прапанаваны матэрыял пра хімічны састаў ежы, пра сервіроўку стала да абеду, правілы карыстання сталовымі прыборамі.

У вучэбным дапаможніку прадстаўлены цікавы асартымент кулінарных страў: стравы з агародніны, мяса, рыбы, першыя стравы. Вы пазнаёміцеся з асаблівасцямі гэтых вырабаў, патрабаваннямі да іх, правіламі прыгатавання і падачы. Тэарэтычны матэрыял змяшчае шмат карыснай і цікавай інфармацыі.

Прадстаўлены ў вучэбным дапаможніку і матэрыял аб беларускай народнай кухні. Тут вы даведаецеся пра асаблівасці беларускай кухні і навучыцеся гатаваць стравы з бульбы і агародніны. У дадатку вучэбнага дапаможніка па кожным асартыменце прапанаваны рэцэпты кулінарных страў, якія вы зможаце прыгатаваць не толькі на ўроку, але і дома.

Раздзел «Апрацоўка тэкстыльных матэрыялаў» раскажа пра валокны жывёльнага паходжання, тканіны з іх, уласцівасці і вобласці іх выкарыстання, а таксама пра простыя ткацкія перапляценні.

Вывучыўшы матэрыял па тэме «Машыназнаўства», вы пашырыце свае веды аб швейнай машыне, яе рэгулятарах, непаладках, якія ўзнікаюць у працэсе пашыву швейных вырабаў. Навучыцеся выконваць акантовачныя швы, якія шырока выкарыстоўваюцца пры выкананні швейных і дэкаратыўных вырабаў.