Урьметли талебелер!

Сизлерни янъы окъув йылынен хайырлаймыз ве кене де ана тили алемине давет этемиз. 8-инджи сыныфта биз сизлернен къырымтатар тилининъ синтаксисинен багълы назарий къаиде-лернен ве нутукъ инкишафына аит меракълы меселелернен таныштыкъ.

Бу окъув йылында да, муреккеп джумле, кочюрильме ве къыя лаф киби, бир сыра синтактик бирлемлер акъкъында малюмат менимсейджексинъиз. Бундан гъайры, сыныфдашларынъызнен берабер субетлешип, метинлер тизип, агъзавий ве язма нутукъла-рынъызны инкишаф этеджексинъиз.

9-ынджы сыныф дерслиги ашагъыдаки тертипте тизильген: кечкен мевзуларны текрарлав дерслеринден сонъ, муреккеп джумле, кочюрильме ве къыя лафкъа багъышлангъан дерслер бериле. Багълы нутукъкъа аит дерслерде нутукъ чешитлери, шекиллери услюплери акъкъында бильгилеринъиз текрарлана ве янъы малюмат изалана.

Эр бир дерете, назарий малюматны текрарламакъ ве пекитмек ичюн, чешит тюрлю мешгъулиетлер (ишлер) бериле. Сиз беджереджек вазифелер ашагъыдаки ренкли бельгилернен къайд этильген:
— Къаиделерни эзберле!
— Къаидени текрарла!
— Къаидени къуллан!
— Суаллерге джевап бер!
— Эв вазифеси.

Урьметли балалар, деделеримизден къалма икметли сёзлерни унутманъыз:
Китап — бильги анахтары.
Китап язмакъ — иненен къую къазмакъ.

Дерсликнен къулланыр экенсиз, сизден сонъ ана тилини огренеджек къардашларынъыз акъкъында къайгъырынъыз: олар ичюн де бу китап бильги анахтары, менбасы олсун. Олар да темиз, бюльбер китаптан тувгъан тилимизнинъ гузеллиги, аэнклиги, назариеси акъкъында бильги алсынлар.

Бильги къазанмакъ къыйындыр, бунъа бакъмадан, тиль алемине меракълы сеяаткъа огъурлы ёллар олсун!