Паважаны чытач!

Развіццё сучаснага грамадства звязана з шырокай інфарматызацыяй усіх яго сфер. Гэта патрабуе ад людзей самых розных спецыяльнасцей высокага ўзроўню валодання сучаснымі інфармацыйнымі тэхналогіямі. Дадзеная кніга дапаможа Вам навучыцца выкарыстоўваць інфармацыйныя камп’ютарныя тэхналогіі, засвоіць асновы праграмавання.

Вучэбны дапаможнік складаецца з пяці раздзелаў.

У першым раздзеле «Асновы алгарытмізацыі і праграмавання» разглядаюцца асноўныя алгарытмічныя структуры і аператары мовы праграмавання Pascal. Вялікая колькасць разглядаемых задач з розных прадметных абласцей дапаможа Вам у дастатковай ступені засвоіць азы праграмавання.

У другім раздзеле «Тэхналогія апрацоўкі тэкставых дакументаў» Вы працягнеце вывучэнне метадаў апрацоўкі тэкставых дакументаў.

Трэці раздзел «Работа з вектарнай графікай» пазнаёміць Вас з графічным рэдактарам CorelDRAW.

У чацвёртым раздзеле «Шкоднае праграмнае забеспячэнне і ахова інфармацыі» абмяркоўваюцца важныя для кожнага карыстальніка камп’ютараў пытанні інфармацыйнай бяспекі.

Матэрыял раздзела «Работа з электроннай поштай» апісвае прынцыпы работы з электроннай поштай. У раздзеле 5 разглядаюцца таксама правілы паводзін і зносін у сетцы Інтэрнэт, афармлення электронных лістоў, меры бяспекі пры перапісцы.