Азиз талебелер!

Сиз бу сене мектепнинъ экинджи басамагъына адым аттынъыз. Бу йылдан башлап сиз чокъ янъы фенлер огренеджексиз.

Йыл-йылдан сизинъ бильгилеринъиз артаджакъ ве кенълешеджек. Мектепни битиргенде, бильгили, медениетли яшлар ве къызлар оларакъ, къолунъызгъа кемалатлыкъ, пишкинлик шеадетнамесини алырсыз. Бу къыйметли шеадетнаме сизинъ келеджектеки яшайышынъызгъа ёлланмадыр. Сизлер ичюн алий окъув ве зенаат алув юртларынынъ къапулары ачылыр, истеген зенаатынъызны огренирсиз.

Озь истек-ниетлеринъизге, арзуларынъызгъа иришмек ичюн, терен бильги саиби олмакъ керек. Терен бильги алмакъ ичюн, бугуньден башлап гъайретнен окъумагъа тырышмалысыз! Дерслерде дикъкъатлы олып,берильген вазифелерни эдинип беджермелисиз.

5-инджи сыныфта да къырымтатар халкъ йырлары, масаллары, эфсане, риваетлерини, бедиий эдебиятымызны огренюв девам этеджек. Сиз халкъымызнынъ тарихы, медениети, урф-адетлеринен таныш олурсыз.

Бу окъув йылы девамында сиз дюнья халкъларынынъ масаллары ве меракълы эсерлерни окъуп, файдалы ве зевкълы малюматлар алырсыз, чешит халкъларнынъ яшайышы, урф-адетлеринен таныш олурсыз.

Китап ве дерсликлер даима энъ якъын достларынъыз, етекчи ве ёлдашынъыз олса, сиз, иншалла, арзу-ниетлеринъизге ириширсиз.